MASOMO YA MISA, JUMATANO, AGOSTI 28, 2024

 MASOMO YA MISA, JUMATANO, AGOSTI 28, 2024

JUMA LA 21 LA MWAKA 

KUMBUKUMBU YA MTAKATIFU AGOSTINO
________

SOMO I

2 The 3: 6-10, 16-18

 

Ndugu, twawaagiza katika jina la Bwana Yesu Kristo, jitengeni nafsi zenu na kila ndugu aendaye bila utaratibu, wala si kwa kufuata mapokeo mliyoyapokea kwetu.

 

Mwajua wenyewe jinsi iwapasavyo kutufuata; kwa sababu hatukuenda bila utaratibu kwenu; wala hatukula chakula kwa mtu ye yote bure; bali kwa taabu na masumbufu, usiku na mchana tulitenda kazi, ili tusimlemee mtu wa kwenu awaye yote. Si kwamba hatuna amri, lakini makusudi tufanye nafsi zetu kuwa kielelezo kwenu, mtufuate.

 

Kwa kuwa hata wakati ule tulipokuwapo kwenu tuliwaagiza neno hili, kwamba ikiwa mtu hataki kufanya kazi, basi, asile chakula.

 

Sasa, Bwana wa amani mwenyewe na awape amani daima kwa njia zote. Bwana awe pamoja nanyi nyote.

 

Salamu zangu mimi Paulo, kwa mkono wangu mwenyewe. Hii ndiyo alama katika kila waraka, ndio mwandiko wangu. Neema ya Bwana wetu Yesu Kristo na iwe pamoja nanyi nyote.

 

Neno la Bwana...Tumshukuru Mungu

________

WIMBO WA KATIKATI 

Zab 128: 1-2, 4-5 (K) 1

(K) Heri kila mtu amchaye Bwana.

Taabu ya mikono yake hakika utaila;

Utakuwa heri, na kwako kwema.

Mkeo atakuwa kama mzabibu uzaao,

Vyumbani mwa nyumba yako. (K)

Tazama, atabarikiwa hivyo, yule amchaye Bwana. 

Bwana akubariki toka Sayuni,

Uone uheri wa Yerusalemu siku zote za maisha yako. (K)

________

SHANGILIO

Yn 10: 27

Aleluya, aleluya,

Kondoo wangu waisikia sauti yangu,
nami nawajua, nao wanifuata.

Aleluya.

________

INJILI 

Mt. 23: 27-32

Yesu alisema, Ole wenu, waandishi na Mafarisayo, wanafiki! kwa kuwa mmefanana na makaburi yaliyopakwa chokaa, nayo kwa nje yaonekana kuwa mazuri, bali ndani yamejaa mifupa ya wafu, na

uchafu wote. Vivyo hivyo ninyi nanyi, kwa nje mwaonekana na watu kuwa wenye haki, bali ndani mmejaa unafiki na maasi.

Ole wenu, waandishi na Mafarisayo, wanafiki! kwa kuwa mnayajenga makaburi ya manabii, na kuyapamba maziara ya wenye haki, na kusema, Kama sisi tungalikuwako zamani za baba zetu, hatungalishirikiana nao katika damu ya manabii. Hivi mwajishuhudia wenyewe, ya kwamba ninyi ni wana wao waliowaua manabii. Kijazeni basi kipimo cha baba zenu.

Neno la Bwana...Sifa kwako, ee Kristo
________